*एकटी चिमणी*
कर्ज बनलं ग फास
केलं पांढरं कपाळ
नाही पहावलं सुख
कसं अभद्र हे भाळ
झाली होती ग आमच्या
साल दोनच लग्नाला
धाडीयेलं आमंत्रण
दुष्काळानं ग विघ्नाला
फुल एकच फुललं
संसाराच्या वेलीवर
लय होता जीव त्यांचा
इवल्याश्या मुलीवर
कोण कुणाचं असतं?
आपलच मेल्यावर
एकटच ग झुलावं
लागतयं झुल्यावर
स्वप्न पडली पांढरी
कधी होती ग रंगीत
गेले विरूनीया रंग
आता निरस संगीत
आता एकटी चिमणी
नाही चिमणा साथीला
तेलाविना सांग कसं
बळ येईल वातीला?
✍🏻 *लक्ष्मण दशरथ सावंत*
*जि.प.कें.प्रा.शा.पाल,औरंगाबाद*
© *ldsawant.blogspot.in*
No comments:
Post a Comment