चला बालकांनो

*चला बालकांनो*

चला बालकांनो आज
मजा  निसर्गाची  पाहू
सा-या गमती जमती
मनी  साठवून  ठेवू

विचारूया पाखरांना
झेप घेतात ते कसे
रात्र दिवस पाण्यात
कसे राहतात मासे

रोज  नवीन  आकार
कोण चांदोबाला देतो
सप्तरंगी  इंद्रधनु
कसा आकाशात होतो

पंख दिले कोणी तुम्हा
जरा विचारू पक्षांना
गोड फळे देता कसे
पुसू जाऊनी वृक्षांना

काळे काळे ढग नभी
येती अचानक कसे
कोणी दिलेत मोराला
छान रंगातली पिसे

काडी काडी जमवून
किती छान खोपा होतो
साप आयत्या बिळात
कसा निवारा शोधतो

✍🏻 *लक्ष्मण दशरथ सावंत*