प्रिय सखे

🌹 *प्रिय सखे* 🌹

सात फेरे लग्नाचे घेवून
माझ्या जीवनात आलीस
शीतल चांदण्यांची बरसात
तु माझ्या अंगणी केलीस

तु नसतीस जीवनात तर
रूक्ष वाटले असते जीवन
तुझ्या पावलांनीच झाले
माझ्या जीवनाचे नंदनवन

तु आलीस या जीवनात
असा दैवयोग तो घडला
जणू स्वातीच्या नक्षत्रात
थेंब शिंपल्यामध्ये पडला

सदैव सोबत माझ्या तु
सुख दुःखात तुझी साथ
ऊन्हाचा कडाका सोसला
उभी भिजतही पावसात

रुसवा-फुगवा क्षणाचा
मज आनंद जातो देऊन
पुन्हा गाली तुझ्या हासू
जणू गुलाब आला फुलून

अशीच राहावी सोबत
कधीही दुरावा न येवो
तुझा हात या हातामध्ये
साथ आयुष्याची होवो

✍🏻 *लक्ष्मण दशरथ सावंत*
*जि.प.कें.प्रा.शा.पाल,औरंगाबाद*
© *ldsawant.blogspot.in*